Thursday, November 13, 2014

SA UMPUKAN

Ito ang aking entry sa 2014 Saranggola Blog Awards. Nais kong ipakita sa aking tula ang kahalagahan ng wikang Filipino sa ating buhay na madalas ay napangingibabawan ng banyagang wika sa ating sariling bayan. Bagamat wikang dayuhan ang gamit sa mga pili at pasosyal na "umpukan", nanatiling taal at "komportable" ang wikang Filipino dahil ito ay ang ating wikang kinagisnan. Anu man ang ating gawin, ito ang wikang kay sarap uwian at balik-balikan.  






"SA UMPUKAN"
Sa panulat ni Earvin Charles B. Cabalquinto

May paganyaya ang lambing ng gabi.
Doon sa mala-pulong umpukan

       Nagtatawanan,

                                   Naghuhuntahan,

               Nagpapasiklaban,

Bida ang mga di mawaring salita.

Sa galaw ng ilaw, sumayaw ang mga salita.
Yumapos,
Humalik,
Nakipagtalik.
Sigaw ng isa, "The night is young!"
Patikim pa lamang ito.


Naghari ang mga salita.
Pinagpantasyahan.
Sinamba.
Minahal.
At ikaw ay unti-unting N
                                      A
                                         H
                                            U
                                                L
                                                   O
                                                     G
 sa mga espasyong naging L
                                          U
                                            S
                                              A
                                                 W    at  mababaw.
Bulag, pipi at pilay mong hinanap,
mga konkreto at tiyak na sandalan.

At doon sa labas.
Sa dilim.
Sa pag dagundong ng langit.
B
   U
       M
           U
              H
                 O
                    S
                      ang ulan.
Sa agos ng tubig sa kanal,
mga agam-agam ay inanod.

Tanong ng taxi driver, 
"Boss, saan po tayo?'
Pamilyar.
Simple.
Di magarbo.
Tunay.
Komportable.
Wika mo, "Ituturo ko na lang po."

Sa labas ng umpukan.
Hindi ka naligaw.
Ikaw ay buo.


Ang tulang ito ay entry sa 2014 Saranggola Blog Awards.



No comments:

Post a Comment

ShareThis